svoltasi
a
SETTIMO S. PIETRO (CA)
dagli improvvisatori
ATZA OMERO di Settimo S. Pietro
ZEDDA PAOLO di Sinnai
FILIA DANIELE di Sinnai
PITTAU RICCARDO di Guasila
Atza
Sa creazioni terrena
est opera divina e immensa
chi su divinu Deus ìat creau
cun potenza e manu divina
terra mari e volta celesti
chi ammirendi tottu no m'affastiu
di Adamu i Eva s'opera infinita
chi raccumandat su divinu eroi
is precettus sus a ndi sighiri
immoi castiu in coxina e in dispensa
po biri ita esti abarrau po cena
Zedda
in custu spetaculu'e natura
de cantai meda mi onoru
su sentidu sindi soddisfait
po su spettaculu offertu
cantu potzu cun su cantu fràndigu
cun su miu donu celesti
e po no fai figura iscrogna
no app'essi aresti e ni brandu
candu est offertu cun su coru
dogna mandigu fait figura
Filìa
su nostru Deus somu
a Giuanni d'affiancat
in issu agattendi su doveri
e in su Giordanu so
Gesus arricìat donu
a is peis de Giuanni Battista
de Elisabetta e Zaccaria fillu opportunu
su chi onoraus oi in custa tribuna
una provista no d'amancat
a unu bonu meri de domu
Pittau
po primu borta chi su palcu tastu
pregu Giuanni de fai su tanti
ca de mesis femu a digiunu
kentz'e allenai in su cantu sa menti
de esordiri no app essi pentzau
duncas nottesta nau ca no mi dromu
isperendi de favoressi
de sa chi incingiu oi de vesti
giudicaindi sa calidadi
chi esti domu de genti benestanti
at essi abarrau calencunu arrastu
Atza
Salomè di Erodiade sa filla
po Erode iat danzau
e di offriat s'amorosa doti
cun is setti velus danzanti
ma Erodiade iat deppiu domandai
sa conca de santu Giuanni beneditta
e cussu rei infami cuntzidèru
arruiat in d'un abissu profundu
segundu itta m'ant allogau
speru de passai notti tranquilla
Zedda
Pepi Sìrigu de su Masu
cun dus de is fradis Zuccas
bessius funt in cassa de margiani
cun d'unu muntoni de pretesas
tottu notti fiant impostaus
ma mraxani non c'est passau
e su incrasi a soli bessìu
de is puddas iat fattu aprappu
appu pappau in mesas mattucas
ma mi sciu accuntentai de su pani e casu
Filìa
Maria Goretti po sunfriri
a doxi annus lompia sa dì
Serenelli di provat is frotzas
ca fudi de una mala arratza
mancai pitticca fut grandiosa
s'errori po no toccai
sighiat sa lei celesti
nendi inguni tengu istima
prima de tastai Atza assiguradì
chi est cosa chi potzas digeriri
Pittau
cun is armadas chi mali si trassant
andàt incontru a sa carneficina
po ai boffiu movi gherra a D'Angiò
Corradinu de novella vesti
po essi sfidau mentis aicci scaltras
de s'edadi beniat traixu
ca su nemigu po beni du scudit
e lassau d'iat custu mundu
a giovunedu serrendi is portas
segundu su manixu chi nc'est in coxina
a bortas sind accudit altras no ndi lassant
Atza
de Settimu in custu comunu
una borta fiat bellu su sattu
tottu is terras andànt a arai
seminanta finas in terrenu grussu
de is crus e in sa mandara so
a is traballus fend unu strappu
e s'arregorta fiat abbondanti
fessit fàa, piseddu o trigu
pigu e pappu de su chi agattu
tanti po no abarrai digiunu
Zedda
immoi si contu su fattu
de sa cantada de nottesta
Pieru Lussu mancai cun penas
tentau at de si esprimi cantendi
ma in dus girus s'est deppiu trattenni
ca su mali d'at postu in affannus
certu prestu at essi sanau
e nosu pregaus chi aicci siat
a sa Madonna e a su Celesti
ca fait onori a su cantu sardu
Riccardu fiat annus abettendi sa festa
e d'est toccau a benni cun sa cena avattu
Filìa
in cust'ora festosa
mancadas funt is scortas
a Pieru in custu divagu
ca sa saludi d'at confusu
ma sa carriera no si guastat
e pentzu ca crasi ancora intrecciad
ca cinquant'annus est bandendi a cantai
de in comunu in comunu
unu imbecciad e in prus de is bortas
po du cenai di bastat pagu cosa
Pittau
un amigu de cab'e susu
ballu sardu ndi scit baddai
ca no ddu portant a tira tira
siat in piazza o in festa in padenti
e in sa festa de Lanusei
d'appu biu cummenti sciampittat
at figurau puru in Abbasanta
ca su pei ddu movit in fini
accumpangiau de su bim bam boi
prus lestru de unu gattu aresti
c'esti chini invitat sa genti a cenai
poi nanta pretzei sa cadira in dusu
Atza
Napoleoni su generali
in Russia di toccànt is tastus
su cali a deppiu indietreggiai
po su frius e s'offensiva 'e is russus
e cussa battaglia no iat bintu
torrendi in patria ti sfogas
a Waterloo beniat avvilìu
in cussa battaglia deppendi arrui
si tui mi bogas de cussus pastus
mi biu custrintu a torrai mali
Zedda
Riccardu mi parit siguru
ca de sa rima conoscit sa lei
ma es mellus chi deu t'apaxu
in custu canta canta
no tengast pressi de figurai
prus a prestu misura is scortas
e no ghettis a chilus ma a gramu
aguantendu in is peis frimus
is primus bortas chi invitànt a mei
m'adattamu a pappai strantaxu puru
Filìa
unu bolidu de sturrus
sa retza prenu m'anti
e de pinna casi a mi da intingi
ca de su gruppu no si spraxit
invecis su trudu scièus
ca de sei bandat a si fui
e poi a ora de ddu coi
ge si scid ch'est prus saboriu
sciu ca a tui ti praxit su picanti
e oi ti feus lingi is murrus
Pittau
oi no pentzu chi fama nd agrandiu
poitta a digiunu da tengu sa menti
no pentzamu chi oi m'arricìanta
però sbagliendu solu s'imparat
e po chi siat una partixedda
abarru sempri in su fattu miu
de no essi allenau mi dispraxu
ca seu innoi po aggiudai a Lussu
ca at detzidiu de scioperai
a cussu chi sciu e narat sa genti
mancai strantaxu a Zedda d'iant prandiu
Atza
in Santu Sparau e in Muristeni
ddui cantamu de tanti in tanti
cun cantadoris de altru ramu
finas de Biddesorris in su comunu
dui cantamu finas de primu Lunis
cun Matta e Broi chi si scirìat
cun Urru e Saba de Terreseu
chi oi no funti prus in cunsigna
in Sinnia nci fiat unu ristoranti
e deu ingunis mi cenamu beni
Zedda
in sa corti di Eleonora
ingruxaus si funti is destinus
Torquatu Tassu c'est passau
e nanta chi fesit amorixendi
cun Lucrezia sa sorri creu
Terramagninu da is poetas mannus
cumpostu in c'iat cun prò
cun arti bona e chentz'e nexi
unu manuali de su poetai
giai dexi annus currendi festinus
e no mi seu ingrassau ancora
Filìa
ca fut intera laguna
scieus diventàda tottu sa dimora
tui Noe ca no camorras
e de partiri no ti frenas
Deus po stu t'iat cumandu
e un arca ti cuncordasta
a monti Ararat po afflui
po dogna ratza fadìast cunsinnia
in Sìnnia ti cenasta e ti cenas ancora
ma tui e candu ndi torras una
Pittau
Tzieddu Lanfrancu scupat su mustu
po Nuragus e po Cannonau
mancai no siat de Oristani
sa Vernaccia ndi portat scappu
e mi praxit a ndi tastai
alternedidda cun su Cirò
e is francesus chi ddu scirìant
ddis fadiat movi s'apetitu
ma point benni a si fai bisìta
ca de cupponis ndi dis prengu quattru
atru invitu no nd apu acettau
poitta mi olìant donai cani arrustu
Riccardu Pittau su strangiu
mi parit una menti donosa
seu pighendindeddi giai s'arrastu
ca cantat cun menti serena
e si esti e s'amanniat sa vesti
innoi iat a tenni richiamu
po primu borta oi d'appu intendiu
ma chi esti e torrat innoi
de mei agattat sa basi
oi m'abettammu cena apettitosa
ma d'as cumprendiu ch'est pastu de arrangiu
Zedda
abettendi seu chi si trocciat
custa gherra de sanguni infusta
s'americanu prepotenti
su mundu bolit dominai
contendi seu is oras e is dis
ma sa sperantzia no est cosa utili
ca su tempus no benit in pro
poitta ca su prus aresti
ndi pigat sempri su cumandu
est inutili a circai s'aligusta
candu no scis cummenti si scrocciat
Filìa
Marcellu matta de su Sulcis
fut una vesti giusta
po rimas e po sterrinas
teniat sempri lucida favella
cun d'una carriera bona s'est imbecciau
s'arti nosta d'at diffusu
de Talia fillu costanti
de poeta ge teniat vena
ma cena pru bella de custa
t'anti 'ogau finas is dulcis
Pittau
de sa vida funt is casus stranus
de ai pediu oi sa presentzia
a unu novellu cantadori strangiu
a si du nai oi mi permitta
chi sa lingua però no mi trebit
perdonai custu piciocheddu
ca candu calu de palu si basu
chi in sa pagella no m'eis postu zeru
imperu corteddu frochitta e passientzia
e sincasu srebit m'arrangiu cun is manus
Atza
un angelu a Elisabeta
cun fueddus dulcis e gratus
su cali d'iat deppiu annunciai
de Giuanni is originalis afflussus
e cun Zaccaria si collocat
in su sacru scrittu si diverbis
e nasciat su santu invocau
po fidi deppendu conclui
si tui mi serbis cun cussus pratus
nau ca mi toccat a fai dieta
Zedda
immoi ca si nant evacua
po primu doveri saludaus
isperendi chi mai si traixat
s'aggiudu santu de Deus
sighius eus in sa pista
ghiaus de unu giustu bixinu
ma immoi ca seliat su cantu
in tottu da gherra apprani
cun pani e binu si seus cenaus
su santu batista benedixat s'acua
Filìa
finiu eus sa cena
e unu saludu de coru fromu
e no est giustu chi ndi esempri
chi usaus eus superogna
ma est giustu chi nci siat
su momentu de perdonai
e chi eus cumittiu offesa
poneiddu a parti su bantu
o santu fai chi in dogna domu
sa mesa siat sempri prena
Pittau
ascurtendi crasi m'accattu
chi sa prova arrenescia esti
aturau seu a sa scida
ma solu ascurtendi si bidi
e a sa fini de custa cantada
unu saludu arriccèi profundu
sentza chi prus innòi m'affanni
dogna pei po si ddu torrai
po cenai su mundu de fidi celesti
Giuanni lassàda sa vida in su prattu
Atza
ddu serraus cust'argumentu
e si saludu sentz'e pretesa
a nisciunus portu abusu
po sa genti chi innoi si bidi
s'amicizia mai dda smesu
ca est giustu chi ancora mi presti
e po tottu su comitau creu
innòi siat sempri a cumandu
candu nc'est sa fidi in sa mesa
deu ge mindi pesu prus cuntentu
